പതിനാറു ദിവസം ഫ്രീസറില്‍ വെച്ച കഥ

'പതിനാറു ദിവസം ഫ്രീസറില്‍ വെച്ച' കഥ 

അവന്‍, എന്റെ ആ പ്രവാസി സുഹൃത്ത് ഇന്ന് വീണ്ടും നാട്ടിലേക്ക് യാത്രയാവുകയാണ്,  
ഇത്തവണത്തെ യാത്രക്ക് ഒരുപാട് പ്രത്യേകതകളുണ്ട്,

വലിയ ഒരുക്കങ്ങളൊന്നും ഉണ്ടായിട്ടില്ല,

യാത്രക്കു മുമ്പ് സൂപ്പര്‍മാര്‍ക്കറ്റുകളിലും തുണിക്കടകളിലും കയറി ഇറങ്ങേണ്ടി വന്നിട്ടില്ല,

പെട്ടി കെട്ടുന്നതിനു മുമ്പ് പ്രിയതമയെ വിളിച്ചു “ഇനി നിനക്ക് വല്ലതും വേണോ” എന്നു വിളിച്ചു ചോദിക്കേണ്ടി വന്നിട്ടുമില്ല,

കഴിഞ്ഞ കുറേ മാസങ്ങളായി അവന്‍ മരുഭൂമിയിലെ കൊടും ചൂടില്‍ കഫീലിന്‍റെ ബില്‍ഡിംഗ്‌ മെറ്റീരിയലുകള്‍ക്കൊപ്പം ചെറിയ ഒരു തകര ക്കൂട്ടില്‍ ഉരുകിത്തീരുകയായിരുന്നു,

പിന്നീട് പതിനാറു പകലിരവുകള്‍ ദമ്മാം സെന്‍ട്രല്‍ ഹോസ്പിറ്റലിലെ ഫ്രീസറിലായിരുന്നു താമസം, 
ഇപ്പോള്‍ ഈ യാത്ര തരപ്പെട്ടത് സുമനസ്സുകളായ  കെ എം സി സി ക്കാരുടെ പ്രയത്ന ഫലമായാണ്,

പക്ഷേ പെട്ടികളുമായി വീടണയാറുള്ള അവനെയും കൊണ്ട് വലിയൊരു പെട്ടി വീടണയുന്നതിന്‍റെ രസതന്ത്രം ഒറ്റക്ക് പറന്നുതുടങ്ങിയിട്ടില്ലാത്ത അവന്‍റെ കുഞ്ഞുമക്കള്‍ക്ക്‌ മനസ്സിലാവുമോ?, 
എങ്കിലും അവന്‍ ജീവിച്ചിരുന്നതിന്‍റെ ശേഷിപ്പുകള്‍ ജന്മനാട്ടിലെ പള്ളിപ്പറമ്പില്‍ അടയാളപ്പെടുമല്ലോ........